Kölner Stadtschreiber

Streifzüge im Schatten des Doms

Dat bruch Zigg

Gastbeitrag von El Vira Scheider.

Letztens kohm minge Mann zo mir. Hä meent, isch sull misch doch ens jett mie für de Jesellschaff un für Politik interessere. Immer nur koche, minge Jaade un de Norbarschaff, datt wör ett jo och nit. Hann isch mir jedach, eijentlisch hätt hä jo räsch, und han misch dann och ens jett schlau jemaat, watt in dä Welt esu loss es.

Do ben isch dann op die ärm Pänz in Afrika opmerksam jewoode. Die hann mir esu leid jedonn. Hann isch glich zwei Pateschafte övernumme. Vun do wor ett dann och nit wigg, watt de Kinderärbigg betrifft. Nä, watt do loss es. Bin isch och tirek ner Initative beijetrodde, die dojäje ankämpfe. Und dann hann isch jesinn, watt die de ärm Diere överall esu quäle dunn. Jo … do moht isch misch natürlisch engagiere.

Alsu für de Elefante, de ärm Hüngk und jäjen de dreckelije Transporte … un natürlich de widderlije Höhnerhaltung.

Jezz muss isch äwer sare, datt dat alles jo och Zigg bruch. Fröher hann isch jo immer für die ahle Hermanns mitjekoch. Die wunnt bei uns im Hus, es eijentlisch och soweit noch fit. Nur datt se esse deit, do muss mer immer jett oppasse.

Un für dä Schmitz han isch och immer at ens de Trepp metjepuzz. Dä wunnt op Paterre un hätt en neu Hüff. Dä kann sesch natürlich nit mie esu jot bökke und die janze Reklam ensammele, die do immer op de Ääd litt. Noh de School kohm süns och immer dat kleene Marieche. Dat hätt och jet metjejesse un bei mir de Schoolopjawe jemaht, weil demm sing Mam kütt jo etz jäge 6 Uhr von de Ärbigg.

Manchmol hann isch och op dä Möp vun de Frau Jussehoven opjepass un ben met demm ens en Rund jeloofe. De Frau Jussehove läw allein un es Krankeschwester … un wenn die Schech hät, wullt isch och nit, datt die ovends noch im Dunkle met demm erus moht.

Dat jeht jo jezz alles nit mie esu. Siggdem isch misch engagiere, fählt mir dofür janz einfach de Zigg. Ich setze jezz mies de janzeDach am PC un ben met dä janze Jruppe, wo isch misch einsetze, am schriewe. Do kütt jo noch dat Montesanto, de Wasserprivatiserung un noch manch anderes dobei.

Un wat sull lisch üsch sare … Jezz kohm minge Mann un däht sisch beschwere. Wann ett denn endlisch ens widder jett Ödentlisches zo esse jöv. Hä hätt de Frau Hermanns em Treppehus jetroffe und die däht och atz vum Fleisch falle … und överhaupt: wie datt em Treppehus ussöh. Dat Marieche däht och nur noch schlächte Note us dr Scholl mit no Hus brenge, und dä Möp vun de Frau Jussehove wör och immer am jammere. Un em Jaade deite de Prumme ungerm Boom verjammele und hä hätt och nit jesinn, datt isch do schon jett injekoch hätt.

Hann isch datt minger Fründinn verzallt un die jefroch, watt isch mache künnt.
Säht die: Mach ne Kursus övver Zeitmanagement. Well isch misch jezz och enschriewe. Muss nur noch lure, op die dat och murjens zwesche 5 un 6 Uhr anbede. Weil, süns kumm isch met dä Zigg nit hin.

Elvira Scheider ist unter dem Künstlernamen „Ett Elvi“ als Kabarettistin aktiv. Ihr aktuelles Programm lautet „Unger uns jesaat“

Foto: Wikimedia

Teilen

1 Kommentar

  1. Herrlisch! Loss mer all vür de eijene Dür fäje. Do es jenoch ze dunn.

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.